വീര്യം കെടുത്താനാവില്ല- ഹമാസ്

ഗസ്സ: മൃഗീയാക്രമണങ്ങളും കൂട്ടക്കുരുതിയും കൊണ്ട് ഫലസ്തീന്‍ ജനതയുടെ പോരാട്ടവീര്യം തളര്‍ത്താനാവില്ലെന്ന് ഹമാസ്. എത്ര രക്തസാക്ഷികള്‍ സൃഷ്ടിക്കപ്പെട്ടാലും ഗസ്സ വിട്ടുകൊടുക്കാനോ സയണിസ്റ്റ് ഭീകരരുമായി അനുരഞ്ജനത്തിന്‍റെ വെള്ളക്കൊടി ഉയര്‍ത്താനോ തയാറല്ലെന്ന് ഹമാസ് നേതാവ് ഇസ്മാഈല്‍ ഹനിയ്യ ജനങ്ങളെ അഭിസംബോധന ചെയ്തുകൊണ്ട് പ്രഖ്യാപിച്ചു. കീഴടങ്ങാന്‍ ഗസ്സ ഒരുക്കമല്ല. ഫലസ്തീന്‍ മണ്ണും അഭയാര്‍ഥികളുടെ തിരിച്ചുവരവിനുള്ള അവകാശവും തടവുകാരുടെ മോചനാവശ്യവും അടിയറ വെക്കാതിരുന്നതിനുള്ള സയണിസ്റ്റുകളുടെ ശിക്ഷയാണിത്. എന്നാല്‍ ഈ യുദ്ധമുഖത്തുനിന്ന് പിന്തിരിയുന്ന പ്രശ്നമില്ലെന്ന് ദൈവത്തെയും ഫലസ്തീന്‍ ജനതയെയും ലോകത്തുള്ള മുഴുവന്‍ സ്വാതന്ത്ര്യ കാംക്ഷികളെയും മുന്‍നിര്‍ത്തി ഞങ്ങള്‍ പ്രതിജ്ഞ ചെയ്യുന്നു- ഹനിയ്യ പ്രസ്താവിച്ചു.