തെഹ്റാന്‍: ബഹ്റൈന്‍റെ പരമാധികാരത്തെ ഹനിക്കുന്ന വിവാദമായ പ്രസ്താവന രാജ്യത്തിന്‍റെ ഔദ്യോഗികാഭിപ്രായമല്ലെന്ന് ഇറാന്‍ പ്രസിഡന്‍റ് അഹ് മദി നജാദ് വ്യക്തമാക്കി. പ്രശസ്ത അറബ് കോളമിസ്റ്റ് ഫഹ് മി ഹുവൈദിയുമായി നടത്തിയ കൂടിക്കാഴ്ചയിലാണ് നജാദ് നിലപാട് വ്യക്തമാക്കിയത്. ബഹ്റൈന്‍ ഇറാന്‍റെ പതിനാലാമത്തെ പ്രവിശ്യയാണെന്ന് ഇറാന്‍ ആത്മീയ നേതാവിന്‍റെ കാര്യാലയത്തിലെ ഇന്‍സ്പെക്ഷന്‍ മേധാവി അലി അക്ബര്‍ നൂരിയുടെ പ്രസ്താവനയാണ് വിവാദമായിരുന്നത്. അലിനൂരിയുടേത് വ്യക്തിപരമായ അഭിപ്രായമാണെന്നും അതിനെ തങ്ങള്‍ അംഗീകരിക്കുന്നില്ലെന്നും എന്നാല്‍ വ്യക്തിപരമായ അഭിപ്രായത്തിന്‍റെ പേരില്‍ ആരെയും വിചാരണ ചെയ്യുന്ന കീഴ്വഴക്കം ഇറാനിലില്ലെന്നും അദ്ദേഹം പറഞ്ഞു. അറബ് മാധ്യമങ്ങളില്‍ പ്രസിദ്ധീകരിച്ച ഫഹ് മി ഹുവൈദിയുടെ ഏറ്റവും പുതിയ ലേഖനത്തിലാണ് നജാദുമായുള്ള കൂടിക്കാഴ്ചയുടെ വിശദാംശങ്ങള്‍ വെളിപ്പെടുത്തിയത്.
അലിനൂരിയുടെ വ്യക്തിപരമായ അഭിപ്രായം ഇറാന്‍റെ ഔദ്യോഗികാഭിപ്രായമായി ചിത്രീകരിച്ച് അവസരം മുതലെടുക്കാന്‍ ശ്രമിച്ചവരാണ് അതൊരു പ്രതിസന്ധിയാക്കി മാറ്റിയത്. ഇറാന്‍റെ വിശദീകരണം ബഹ്റൈന്‍ പൂര്‍ണാര്‍ത്ഥത്തില്‍ ഉള്‍ക്കൊണ്ടിട്ടുണ്ട്. ഇരു ആഭ്യന്തര മന്ത്രിമാരും പരസ്പരം സന്ദര്‍ശനം നടത്തുകയും ചെയ്തതോടെ ആ അധ്യായം അവസാനിച്ചതായി നജാദ് ചൂണ്ടിക്കാട്ടി.
No comments:
Post a Comment