റബാത്ത്: ഇറാനുമായുള്ള നയതന്ത്രബന്ധം വിച്ഛേദിക്കാന്‍ മൊറോക്കൊ തീരുമാനിച്ചു. ബഹ്റൈന്‍റെ പരമാധികാരത്തെ ഹനിക്കുന്ന രീതിയിലുള്ള പ്രസ്താവനയുടെ പേരില്‍ സുന്നി അറബ്, ഗള്‍ഫ് രാജ്യങ്ങള്‍ ഇറാനെതിരെ ശക്തമായ നിലപാടെടുത്തതിന് പിറകെയാണ് മൊറോക്കൊയുടെ അപ്രതീക്ഷിതനീക്കം. ബഹ്റൈന്‍ ഇറാന്‍റെ പതിനാലാമത്തെ പ്രവിശ്യയാണെന്ന് ഇറാന്‍ ആത്മീയ നേതാവിന്‍റെ കാര്യാലയത്തിലെ ഇന്‍സ്പെക്ഷന്‍ മേധാവി അലി അക്ബര്‍ നൂരിയുടെ പ്രസ്താവനയാണ് വിവാദമായത്. ബഹ്റൈന്‍റെ പരമാധികാരത്തെ മാനിക്കുന്നതായും അതിന് വിരുദ്ധമായ നിലപാടില്ലെന്നും ജിസിസിയുമായി മികച്ച ബന്ധം തുടരുമെന്നും പിന്നീട് വ്യക്തമാക്കിയ ഇറാന്‍റെയും ബഹ്റൈന്‍റെയും വിദേശമന്ത്രിമാര്‍ കൂടിക്കാഴ്ച നടത്തിയതിനെ തുടര്‍ന്ന് ബന്ധം പൂര്‍വസ്ഥിതി പ്രാപിച്ചുവരുന്നതിനിടെയാണ് കടുത്ത നിലപാടുമായി മൊറോക്കൊ രംഗത്തുവന്നത്.
കഴിഞ്ഞമാസം ഇരുപത്തഞ്ചിന് റബാത്തിലെ ഇറാന്‍ നയതന്ത്രപ്രതിനിധിയെ വിളിച്ചുവരുത്തിയ വിദേശമന്ത്രാലയം ബഹ്റൈനെതിരായ പ്രസ്താവനയില്‍ വിശദീകരണമാവശ്യപ്പെട്ടിരുന്നു. എന്നാല്‍ ഇതുവരെ വിശദീകരണം നല്‍കിയിട്ടില്ല. രാജ്യത്ത് ഛിദ്രതയുണ്ടാക്കാന്‍ ശ്രമിക്കുന്ന ഇറാന്‍ എംബസി, പൊതുവായ മതകാഴ്ചപ്പാടിനും മതധാരക്കും എതിരായ നീക്കം നടത്തുന്നതായും വിദേശകാര്യമന്ത്രാലയം പ്രസ്താവനയില്‍ ആരോപിച്ചു.
Subscribe to:
Post Comments (Atom)
No comments:
Post a Comment